Tangkas do diida roha si Longga boha roha ni si Tumpak tu anggina, si Jojor alai antar ditabunihon do tu kakak na i ala na hea dipasingot among na tingki mulak borngin nasida. Ala ni ido umbaen na jotjot si Longga tu lapo ni si Tumpak unang hansit rohana, huhut manuhor bensin. Otik otik do dituhor bensin disi, somal na sahali saminggu gok do diisi di pompa SBPU di Sibolga, holan sidalian do huhut marsiajar mar bisnis jala mandodo bea bagas roha ni si Tumpak tu anggina i.
Dungi muse lam ribur do kios ni si Tumpak parpudion ala ma tamba be angka boniaga na nigadis na songon gulo, kopi sachet, mie instan, roti, cuka ni gota dohot na asing dope. Songon nasomal, dipotang ari mardalan dalani do si Longga di Simaninggir sahat tu huta Bonandolok jala jot jot do maradian ma ibana mangisi bensin. "5 liter pe namboru", ninna tu inong ni si Tumpak namangisi tangki ni motor nai. "Eh Jojor aha do khabar", ninna si Tumpak na ro sian jabu. "Nga rame kios mon bang, ma bahat hepeng mu nuaeng", ninna dohot minar bohina. "Ah ndaong dope Longga, ai modal ni halak doi", ninna mangalusi. "Manginjam sian si Akiong do abang?", ninna muse manulingkit. "Ah ho nian dia ma olo maminjam hon tu au, so agen na au", ninna mangalusi. Dungi diuduti muse :
" Saleleng on manuhor gota so hu garar kontan, dung pe mulak sian Sibolga pe baru hugarar", ninna si Tumpak muse. "Dion angka kopi, gula, roti i kan bahat do tong modal tusi", ninna si Longga muse. "Ha ha ha i konsignyasi do i, dilean do tingki 2 bulan, lakku jo barang i baru pe ginarar", ninna mangalusi.
"Motor mu pe na baru ya bang, boi do hu coba jo?", ninna si Longga huhut maniop stang ni motor Honda na imbaru i huhut diserbeng si Tumpak sian sormin, spion ni motor i.
"Goar na pe kredit, sai boi ma nean niangsur tiap bulan, unang annon dibuat motor i", ninna si Tumpak mengkel martata.
"Boa do barita ni si Leonard, ma jadian ate dohot si Jojor?", ninna si Tumpak. "Molo jadian beha huroha, na cemburu do abang?", ninna si Longga huhut manonnoti simalolong ni si Tumpak. Mar rara hurum ni si Tumpak umbege, naso dirimpu songoni alus ni kakak nai.
Lao ibana tu kios dibuat 2 botol Coca Cola dohot plastik sedotan na. "Na inum jo, nga mauas ho ra", ninna si Tumpak mengkel, maila ila ala diparate atehon kakak na i do hape saleleng na on.
"So jo bang, hubege ma adong rekeningmu di Bank, tu aha do porlu ni i ?", ninna si Longga na baru pe naik kalas 3 SMA. "Na didok par abangon do asa hubaen Tabungan di Bank, asa niboto sadia balga ni omzet saminggu dohot sabulan. Au pe baru huboto balga ni omzet hu ma sahat Rp 15 juta sabulan, tarida mai di buku Tabungan", ninna si Tumpak mangalusi. "Tulang hamu pe ma dao lobi sian au omzet na", ninna muse manguduti.
"Anggo songoni hu caritohon ma tu Bapak asa dibaen Tabunganna", ninna si Longga. "Sungkun ma molo olo hubuet pe formulir na asa taisi", ninna si Tumpak.
Potang ni ari Sabtu roma si Tumpak tu jabu ni si Longga, dipatorang ma muse tu ama ni Longga porluna adong rekening di Bank. "Naumporlu tulang asa taboto jo tangkas balga ni omzet tiga tigatta saminggu, sabulan, salelengna on holan nietong etong songoni do", ninna si Tumpak. Äi holani do porluna ?", ninna ama ni Longga. "Didok abang, par BRI, haduan boi hita manginjam tu Bank, unang sai marutang tu si Akiong, gabe lomo lomo na do mambaen arga ni gota i", ninna si Tumpak.
"Olo do huroha Bank mangalean utang?", ninna ama ni Longga. "Diboto par Bank do balga ni omzetta molo ta setor hepeng dung sidung manggadis gota hita. Omzet ni tulang ma ambal balga na sian omzethu. Omzet hu ma lobi Rp 15 juta sabulan", ninna si Tumpak ma muse. "Bah songoni do, eh tahe tulang par huta huta on, sai asing do hamu tahe parsingkola nuaeng", ninna. "Baen jo kopi nami Jojor", ninna ama ni Longga muse.
"Ndang pola Tulang, naeng lao majo hami manonton", ninna si Tumpak ma muse. Dua motor ma nasida tuat tu toru tu Sibolga, si Jojor dibonceng si Tumpak dohot Honda naimbaru, si Longga sahalaksa. Mangalewati 2 batu lobang na golap i, dipagomos si Jojor ma manghaol gonting ni si Tumpak, ndang na mabiar nian, ala ndang diida kakak na, ai dijolo di si Longga.
Songon nasomal sai dialap nasida do si Leonard di jabu ni namboruna, molo so lao ibana.
Dung parmisi diumma si Jojor namboru nai, didok si Leonard :"Beta Jojor", ninna. "Kakak ma bonceng", ninna si Jojor mangalusi.Hatop do si Jojor manaek dipudi ni si Tumpak. Dipasip si Longga huhut manaek dipudi nisi Leonard.
Andorang so manonton, maradian ma nasida di ATM ni Bank Mandiri di jalan Diponegoro. "Ai ndang di BRI rekening mu Bank?", ninna si Longga heran. "Boi do buaton di ATM ni Bank na asing songon Bank BNI pe", ninna si Tumpak. Didok si Longga ma tu si Jojor dibege si Leonard:"Bapak pe naeng mambuka Tabungan do, hita pe dapotan ma kartu ATM", ninna.
Andorang so masuk bioskop manuhor sipanganon do nasida di bioskop i. Ndang digarar si Tumpak kontan alai dohot kartu do. Disungkun si Jojor:"Boi do bang pake kartu ATM ate", ninna. "Ndang kartu ATM i Jor, kartu debet do", ninna. "Aha i kartu debet ?", ninna muse. "Jei molo digosok, marhurang ma hepengta di Bank, sadia arga na tatuhor", ninna si Tumpak patoranghon tu nasida na tolu.
Di tingki mangan borngin di Sibolga square didok si Longga ma:"Bang ajari jo hami marlange atik beha laho hita piknik tu pulo Poncan muse, unang holan Su Lian na malo marlange", ninna. "Ma niajaran ho mar bisnis, nuaeng mangido marsiajar marlange, annon marsiajar mar hamlet muse", ninna si Tumpak, mengkel nasida sude huhut dipukkul hon si Longga tanggurung ni si Tumpak. "Sidung marminggu ma hita lao, di hotel Pia Hotel Pandan adong do kolam renang disi", ninna si Leonard.
No comments:
Post a Comment