TOKKE NAPOSO (14)

                 730 tangga tu makam

MARDALANI TU BARUS

Saut do nasida na opat lao tu Barus, Su Lian do manopiri, si Tumpak hundul di jolo, si Jojor dohot si Leonard hundul di pudi. Uli hian tutu dihambirang ni dalan, harambir na tubu di pinggir ni laut, Samudra Hindia.
Ribur do suara ni ende CD lagu lagu Batak, ende Sibolga, ende na mar legot legot, tar asing sian ende Toba. Sipata dibereng Su Lian do tu pudi sian kaca spion, marende ende do nasida mangihuthon ende ni CD i.
Hampir tonga ari maradian ma nasida di sada restoran di kilometer 15, ditoru ni dalan pas disabolah hambirang ni jambatan. Disima nasida mangan arian, jolo dipillit do dekke asa ditutung manang digoreng.

Tingki mangan disungkun Su Lian :"Tu dia do hamu kuliah molo dung tammat ?"
"Kuliah tu Medan, ninna si Leonard", huhut diundukkon si Jojor muse.
"Mambuat jurusan aha hamu", ninna si Tumpak muse.
"Au tu pertanian  do bang", ninna si Leonard.
"Ho jurusan aha Jojor ?"
"Molo boi Akuntansi bang".
"Annon pajumpang ma  calon tunggane doli Akuntan ate ?".
"He he so pinikkiran dope tusi, ale olo do calon naso kuliah asal ma mamora", ninna si Leonard.
Si Jojor mencubit si Leonard. Masiserbengan si Tumpak dohot Su Lian.
Ai ido tona ni nai Longga, molo singkola ba parsingkola ma manotop boruna i.

"Ma denggan i Leo, parsiajari ma jolo taringot tu mananom Tarutung da", ninna si Tumpak.
"Boasa ndang taringot tu gota ?.
"Asa adong pancarian na asing sian gota di huta, ai denggan do kobun durian di Malaysia, sahat do ekspor nasida tu Hong Kong dohot China. Ma hubuhai hami mananom bibit dohot angka tondong di huta, 5 tao naro marpabue ma i"
"O ido na lao abang tu Singapur dohot si Lian", ninna si Leonard
"Olo, ma dua hali hami manggadis tu Singapur"
"Didia do hamu modom di Singapur ?", ninna si Jojor songgot.
Diboto Su Lian aha do maksud ni sungkun sungkun i, na curiga, didok ma :"Si Tumpak di hotel, au di jabu ni tondong hu"
Diserbeng Su Lian si Tumpak, huhut mengkel

Borhat ma nasida tu Barus, hira hira sa jom lobi nai ma sahat. Holan namardalani do nasida tu kota naung tarbarita tu luat portibion ala ni kamfer, kapur barus na huncus i. Ro do sian luat Eropa dohot sian China. Agamo Islam pe parjolo do ro tu Barus sian tu luat na asing di negara on. Bahat angka tanda kuburan na marsurathon aksara Arab kuno.
Lao ma nasida marnida sada, nangkok tu tor natimbo, 215 meter sian laut, manaek tangga na rahis 730 tangga bahat na. Masitiopan do si Leonard dohot si Jojor nangkok tu ginjang. Si Tumpak pe songoni dohot Su Lian najojtjot maradian, ala so somal mardalan.
Nunga pukul 3, mijur ma nasida, dung marhuliang di Barus, mulak ma tu Sibolga, tu jabu ni si Leonard ala disi motor ni si Jojor. Anggo motor ni si Tumpak dijabu ni Su Lian do.
"Ndang porsea au namarsirang modom hamu di Singapur", dihusippon si Jojor nanget tu sipareon ni si Tumpak, huhut mengkel.



Di tokko ditorushon nasida manghatai taringot tu Mini market na dilambung ni jabu ni si Tumpak dibege Abang ni Su Lian.
"Koh andigan tu dolok mangida kiosk nami, lean jo pandapotmu"
"Barang aha dope na hurang huroha ?"
"Boras, miak tano, gula, gas hurang, jotjot do suda".
"Hudokkon hami pe tu distributor asa ditambai, hami pe manjamim"
"Mauliate koh"
"Sadia omzet harian nuaeng bang ?", ninna Su Lian.
"Hira hira Rp 2 - Rp 2,5 juta"
"Dapot pangomoan 10% nga boi dapot Rp 5 - Rp 6 juta sa bulan ate"
"Ya koh, on ala ni si Lian do on"
"Mauliate transfernya bang", ninna Su Lian ala tiap bulan do digarar komisi 20% tu Su Lian, songon parjanjian naung diteken.

"Parmisi majo au mulak da"
"Jolo mangan majo"
"Mauliate koh, naeng mangan dijabu dohot natua tua i"
Maradian ma si Tumpak di restoran manuhor Mie goreng, martabak dohot Sate padang boanon na tu huta. Ditelpon ma ibotona di jabu.
"Ito unang jolo mangan hamu, huboan do mie goreng"
"Olo ito"