TOKKE NAPOSO (16)

Anggo manuhor gota sahali saminggu do tu onan, dungi muse angka agen agen nape marroan do tu onan Rampa martulak gota nadi tuhorna be. Si Tumpak nunga manongos SMS arga ni gota situhoron na sida. Ianggo angka tondong, hombar balok dohot angka dongan tu lapo ni si Tumpak do diboan. Amang, ibotona ma boi manimbang molo so disi topet si Tumpak. Muse nai nunga boi saonnari digarar kontan gota i, ma dibaoa tu amang na sadia arga panuhoran

Asing sian ari onan ma neang langka ni si Tumpak lao mangula angka na asing, tu bank, tu tokke, tu fabrik gota. Lao do ibana muse tu Padangsidempuan mandiori kopi Mandailing naung tarbarita i, naung di ekspor tu luar. Mar bus Sibualbuali do ibana tu Padangsidempuan ala ndang pola dao holan 88 km do sian Sibolga. Sidung mangan lao ma ibana tu lapo King kopi na di dalan Kenanga. Disungkun ma nampuna lapo i :
"Horas ipar Lubis, baeh ipar jo kopi i ba"
"Ndang hea dope hamu tuson huida"
"Par Sibolga do au naeng papungu kopi sangkaphu ipar"
"Ba hupatudu pe angen ni kopi"
"Tabo jala huncus ba"
"Tabo nai ala tehnik doi ipar, binaen 60% green bean natata, 30% tehnik roasting, merebus, 10% nai tehnik brewing, seduh"
"Jago do ilmu ni ipar i bah"
"Ai so holan kopi Mandailing hubaen hami dison, kopi Gayo sian Aceh dohot kopi Lintong, kopi Sidikkalang pe adong do, naeng cobaon ni ipar sa cangkir?"
"Baen ipar majo kopi Gayo i dohot donat i 2 da"
"Hmmm um angur aroma kopi Gayo on ate"
Dilean si Lubis ima tolu alamat ni agen kopi di Padangsidempuan.

Potang i mulak ma muse tu Sibolga jala diboan ma 3 kg kopi Mandailing. Ditonga dalan maradian muse Bus disada huta, dituhor muse 2 bungkus oleh oleh boanon na tu jabuna, sada leanon na annon tu Bpk Longga. Ditonga dalan mar SMS ma imana tu Singapur :
"Lian, ma hudai kopi Mandailing na arian, tabo huncus songon kopi Lintong ni Siborong borong"
"Dituhor ho do biji nai ka?"
"Hutuhor 3 kg"
"Tongos ma i muse tu Laboratorium da"
"Beres sayang"
"Tu si Jojor do roham, huboto doi"
"Ndaong, adong do hallet na, pariban na i, si Leonard"
"Lao maho muse tu Takengon, lului majo kopi Gayo, hubege tumabo aroma nai huncus"
"Olo minggu naro ma ate, asa huurus jo sude angka tiga tiga di kios, asa huetong jo stock dohot barang situhoron".

Ditaruhon ma sa karung salak i, dijalo inang ni si Longga.
"Mauliate bere, nasian Sidempuan do ?"
"Olo nantulang"
"Adong nion amplop sian tokke Akiong diboan tulangmu nantoari"
"Mauliate nantulang, mulak majo au"
Ndang pola dibuka si Tumpak dope amplop  na marra i, somal do dapot undangan parbaagason ni halak China, angka tokke dohot sian fabrik Crumb rubber.
Dung sidung mangan, masuk tu bilut dijaha ma ise do na kawin i. Tarsurat ma disi tangkas SU LIAN.
Songon naso porsea si Tumpak, nantoari dope martelpon so adong nang sakkababa dipaboa tu ibana.

Marsogot nai sai songon na murhing bohina, ndang songon nasomal mar gere gere.
"Ito, ai holan na sala do paretongan mu, etong jo muse stock ni barang on"
"Songon na gogo soaram ito, aha namasa sian nasogot songon na manombo ho?"
"Na loja do au, marsogot naen lao muse tu Takengon"
"Ba pa langet soarami tu ibotom", ninna amang na.
"Ala nanaeng muli ido si Su Lian, huida nangkin undangan na rara i?"
"Andigan bapak", ninna boru na i.
"Nion jaha ma"
"Marsogot naeng mangida kopi Gayo au tu Takengon, ido baen na hupareso buku ni ito on"
"Ba antan ma unang pabahat hu boniagam, on ma taula ma sae be i"
"Tarutung holan musim do bapak, molo kopi torus do adong, jala ndang mura busuk".
"So hea beho leleng dijabu holan na lao", ninna inang na.

Laoma si Tumpak tu bagasan bilutna, sai dirimang rimangi ma hata ni ito, inang dohot amang na. Tutu do tahe boasa gabe muruk muruk au, boasa pa heppot tu au na marboniaga i. Su Lian pe malo hian mar gabus. Naeng ditelpon tu Singapur alai sai busisaon aha do namasa, aha do na sala hubaen.
Ndang tahan be imana manabunihon arsak ni rohana.
"Hallo, boasa sai margabus ho tu au?"
"Ndang na margabus au, ai naso barani do au paboahon tu ho"
"Ai ise i tunggane doli mi, na mora do ate ?"
"Huorahon do ho  malua, mabiar do ho"
"Saonnari ma hita mangalua, rope au tu Singapur, marsogot"
"Tumpak Tumpak, ma leleng huboto na holong roham tu si Jojor"
"Unang asing hata hatam"
"Na didok si Jojor do tu au na masihaholongan hamu ditingki marlange hita ni hotel i, si Leonard i holan sidalian na doi mangalo hita".
"Ndang ro au tu pesta mi, ala digabusi ho au".

Ndang saut be ibana lao tu Takengon marsogot nai. Ari Rebo minggu naroi ma muse ibana martahi lao tu Takengon sian Medan.
Di malam minggu ditelpon ma si Jojor.
"Hallo Jor, aha do khabar ?"
"Baik bang, andigan tu Singapur muse ?"
"Marhua tu Singapur, ndang musim tarutung dope"
"Songon na asing suaramu bang, aha namasa ?"
"Ise dongan mu saonnari ?"
"Boasa huroha, dijabu ni dongan hu, halak karo"
"Didia si Leonard ?"
"Dia ma huboto i, martandang ra"
"Martandang, ai ndang rap hamu ?"
"Rap boha maksud ni abang, ibana dohot dongan dongan na"
"Abang ari Rebo minggu naro kan ari libur naeng ro au ari Selasa borngin"
"Lao hita mardalani tu Takengon mamereng tao laut tawar, mar pesawat pe hita"
"Ise donganta ?"
"Holan hita nadua pe unang paboa tu kakakmu da"
"Pintor mulak pe hita potang"

Pukul 9 manogot ma sahat nasida di bandara REMBELE Takengon. Mijur sian pesawat Wing air na ngalian, 14 derajat celsius. Ala tarbarita surgo ni kopi dison, dicuba nasida ma minum di bandara i antong. Mansai tabo huncus aroma nai, nasogot ndang sanga dope sarapan ala tarhipu hipu dungo.
Takengon on sada sian tolu Kabupaten di dataran tinggi Gayo di Aceh Tengah disambola ni Kabupaten Aceh meriah dohot kabupaten Gayo Lues. Angka rombongan pe boi do ro tuson ai mura do ongkos mar bus, holan Rp 150.000 nangpe dipardalanan 10 jom, daona 430 km. Molo mardalan borngin, manogot i ma sahat

Lao ma nasida mamereng tao Laut tawar di dolok dolok. Tarida ma uli ni tao i ndang dao imbarna sian haulion ni tao Toba. Hatinggalan nasida ala holan na marporang i saleleng on. Alai nuaeng ma aman, adong muse bandara, lam ribur ma ro turis tuson. Olo ma talu tao toba ala ni jungkat ni angka partiga tiga.
Di dolok i manatap tu nadao, adong dope awan mangalingkupi tao i. Tong ma minum kopi gayo nasida huhut manatap haulion na humaliang tor dolok dolok. Tarjaha ma di dolok i goar na mansai balga GAYO HIGH LAND

Ala naung tarbarita do kopi Gayo diportibi on, lao ma nasida tu sada lapo Koperasi ni angka ina.
"Assalamualaikum, ibu mana kopi yg terbaik, berapa sekilo ?"
"Rp 120.000 mu beli banyak ada diskon"
"3 kilo saja, jika beli 1 ton berapa diskonnya"
"Bisa minta emailnya, nanti saya email harga nego"
"Dimana lagi toko penjual kopi bu ?"
"Dikota Takengon banyak"
"Terima kasih bu"


Dung humaliang mamereng tokko kopi di kota Takengon, maradian ma muse nasida dijolo ni lapo ni halak Aceh,
"Nga male ate, mangan majo hita"
"Ikan apa bu yang enak ?"
"Coba pak Masam Jeng, ikan jahir tawar, lebih besar"
"Ya coba 1 porsi, apa resepnya?", ninna si Jojor
"Bumbu kunyit, cabai, bawang merah dan bawang putih. Periuk dari gerabah.plus daun gegarang, daun  Gayo dan andaliman"
"Ai tu aha dituhor ho kopi si 2 kilo i"
"Naeng manggadis ekspor kopi tu Amerika. Marsogot boanon ma kopi on tu laboratorium di Medan asa binoto kwalitetna"
"Boasa ndang tu Singapur ?"
"Ho nean paula so diboto ho naeng sohot nama si Sun Lian kan?"
"Ma dipaboa Bapak tu hami"