Tung marsigorgor do torus ate ate ni si Poltak namartinju i di Pemandangan Indah potang ni ari minggu nasalpu. Ala tentara maila pangkilalaanna maradophon si Longga.
Nunga dua borngin sai gasa gasa on si Poltak manggas gogo dohot marklekson motor nai mansai ganjang dijolo ni jabu ni si Leo di Sikkola tukkang, nangpe nunga bagas borngin. Di patolu bornginhon, ndang sabar be ate ate ni si Leo, disi tarbege suara ni motor ditonga borngin i, pintor ditimbung ma tu motorna.
Masi lelean ma nasida mulai sian sikkola tukang, terus tu lapangan simare mare. Marbelok tu hambirang dijolo ni kantor Bank Indonesia marputor muse di lapangan bola. Disenggol si Poltak ma motor ni si Leo,alai ndang madabu. Dilele si Leo muse, marputar ma tu jolo ni SMA Negeri 1, marganti si Leo nama manenggol motor ni si Poltak, pas dijolo ni bundaran PLN. Si Poltak mengkel engkel ala madabu ma si Leo di simpang lima i. "Taonton, pajago jagoon ho", ninna si Poltak laos ditinggalhon balging songoni. Marmudar ma uluna jala manetek, hona tu abitna, marrara. Untung adong polisi lewat disi, laos diboan tu RSU ndang sadia dao, di kota Baringin.
Ditelpon si Leo ma si Longga dijabuna borngin i, tarsonggot hian ibana. Naeng ro do borngin nai tu Rumah Sakit, alai diorai si Leo. Martahuak manuk pintor dilojongi si Lonnga dohot anggina si Jojor mamereng tu Rumah Sakit, huhut marpahean singkola manogot i. Dipaias si Longga do mudar natinggal otik di obukna, huhut ditiop ulunai. "Didia dope na hansit Abang", ninna si Longga huhut didadapi pamatangna dohot patna, ala tengkat ibana mardalan. Tar ummalum huhilala ala diparrohahon paribanki do au. Na asi do rohana tu au manang na holong, ndang apala huboto tangkas. Autsugari ma nean hami saut, lam ringgas ma au ra marsiajar, hatop sidung kuliahku, ninna dibagasan rohangku. Si Jojor pe, mambaen tes huhut manulang au bubur lao sarapan.
Arian nai, roma si Poltak tu sikkola, lao manogihon mulak tu Simaninggir. Alai si Longga maminjam motor ni Bapakna, lao mamereng si Leo muse tu Rumah Sakit dohot si Jojor. Pintor posa do hata ni si Longga tu si Poltak :
"Abang boasa songoni ho tu Abang i, ingkon mangido maaf ho saonnari", ninna si Longga.
"Ai imana do manenggol au umbaen madabu", ninna si Poltak.
"Nunga hubege sude, unang macam macam hatam", ninna si Longga.
"Molo so olo do ho mangido maaf, putus ma hita, mulai saonnari", ninna marrara hurumna na bottar i.
"Paima jo asa hupatorang", ninna si Poltak. Alai ndang apala dibege si Longga, hatop pangoluhon motor, borhat dohot si Jojor tu Rumah Sakit muse. Si Poltak ndang olo dohot.
Malam Sabtu sahat malam Minggu i, di jabu ni si Leo do si Longga modom. Ai somal do songon i, sipata di Simaninggir do si Leo modom, songoni do sian met met nasida. Ma masibotoan do Nantulang dohot Inang, asal ma dipaboa.
Borngin i rodo si Poltak tu Simaninggir, diboto ma nadi jabu ni paribanna i do imana modom sahat tu ari Minggu. Tamba marari purun ma ate ate ni si Poltak.
Sai diradoti si Longga do mambaen sipanganon, dohot mangganti perban di ulu ni si Leo.
Mambukka kaosna pe sai si Longga do nadua ari i. Huncus anggoon ala mansai jonok hami..
"Unang macam macam tangan mi, anggo so marsahit ho, dang bukaongku kaosmu":, ninna si Longga huhut mekkel, mansai bagak ipon nai taratur berengon. Hape ndang marlipstik, nunga songoni ulina.
Dung saminggu, di ari Jumat nai potang ari nga malum anggo ulukku hulila, holan mardalan nama nasongon na tengkat saotik. Lao ma au tu Simaninggir. Pintor Tulang dohot Nantulang do na humalaput mambuka pintu. "Nga sehat ho huroha bere", ninna Tulang dohot Nantulang. Torus ndang maradian manungkun songon senapan mesin aha do boccirna, boha do boi gabe songon i. Dung hupatorang langet langet ndang timbo soarangku, hohom ma nasida.
Dung ro si Longga dohot si Jojor didok tulangma : "Leo, molo dung sohot hamu, boi dope torus kuliah ?". Songgot au umbege sungkun sungkun i, ndang huboto mangalusi, dungi ditunjang si Longga pathu huhut di goyang goyang uluna. "Boi...boi Tulang", ningku mangalusi songon na mogap ogap. ditunjang si Longga muse pathu. Diuduti Tulang muse :"Boha molo jolo tukar cincin hamu andorang so mulak tu Yogja", ninna. "Huhatai hami majo Bapak", ninna si Longga huhut manerbeng au, murhing bohina.
Naeng mulak au tu Sibolga, andorang so potang ari, si Jojor mangelek elek "Bang bang beta jo tu Pemandangan Indah, adong sidokkonongku, porlu hian. "Bah, apala aha muse on", ninna rohangku dibagasan. So huboto rahasia aha do sidohononna, unang dibege isi ni dijabu i. "Paboa jo tu kakakmu", ningku targogo. "Nga apa apa bang", ninna kakakna sian bogasan.
Sai heran do au boasa sai dijujui angginai pajonok jonok tu au. Mambaen tes, manonduk indahanku gabe sai anggina i disuru.
Di Pemandangan Indah adong do tolu pasang nai naposo hundul padua dua, mamereng rara ni mataniari potang i di Teluk Tapian Nauli i di nadao.
"Ai aha do huroha adek namansai porlu ?", ningku manungkun. Ndang apala jonok parhundul nami, maradop adopan do, sotung asing annon fikiran ni si Jojor, narohangku.
"Bang denggan do raporthu, molo lulus UMPTN, naeng singkola au tu Yogja, olo do Abang mambantu au ?", ninna manungkun sian rohana huhut diserbeng matakku paima alus. "Nga hupaboa sangkaphu tu Bapak, Bapak pe manolopi do", ninna apala gomos.
"Oh, pasti, pasti do hutolong, pataruhon tu Yogja, mandaftar, mandiori kos, beres mai, unang pola mabiar ho ", ningku huhut martopak tangan hami huhut mengkel. "Au naeng sikkola Akuntansi bang, aso adong sian bagas nami na sarjana, anggo kakak tu Medan do", ninna.
"Boasa tu Medan, ala na disi do si Poltak sekolah Secapa ra ate ?", ningku muse.
"Ya bang, didok kakak nunga didok si Poltak holong ni rohana, alai ndang dialusi kakak dope", ninna.
"Aupe gabe bingung do mamereng Abang, nga hea didok Abang holong ni roham tu kakak ?", ninna.
"Ndang hea dope, ala bajar dope natingki borhat i au tu Yogja, esempe dope imana tingki i", ningku huhut hupikkir, on ma ra tingki na na pas mambuat roha nisi Longga. Dohononku ma ulaning, lomo ni rohangku ?. Boa molo so olo, ala nga dipasahat si Poltak hatana. Marungkil ma au mamikkiri i.
Dung dihatai Tulang rencana tukar cincin, si Longga tung maol modom mamikkiri hata holong ni si Poltak, alai dipikkiri muse pangalahona tu au, donganna magodang i. Dipikkiri muse leleng dope au aso sai sikkola, dungi mangalului karejo dope. Molo manganggur bea ma. Ndang mungkin Amangboru mambalanjoi hami.
Sai loja marpikkir, dibuatma kunci motor ni Bapakna, lao ma imana tu Sibolga manungkun namboruna. Ai tung holong do roha ni namboruna i tu maen na i. Molo pakansi olo do diboan maen nai dohot manjaga tiga tiga di kios pakean nasida di kebun bunga, Sibolga.
"Horas namboru", ninna huhut diumma. Torus roma si Leo mandapothon. " Unang bege bege hami mangkatai, on urusan ni boru boru do", ninna si Longga. Ba lao au antong tu tangga dijolo mamereng angka namaridi di aek godang dijolo ni jabu nasida di sikkola tukkang.
"Aha do didok Bapak tu Namboru?", ninna si Longga huhut dipajonok inganan ni napuran tu namboruna.
"Naeng tukar cincin hubege, boa do diroham hasian", ninna huhut dijama hurum ni maen nai.
"Tapaima ma Abang sidung sikkola na, unang gabe sipikkiranna i annon namboru", ninna mangelek namboruna.
"Tapaima ma hata ni Bapakmu manang na songon dia", ninna namboruna mangalusi.
Mulak ma Bapa hatop arian i sian pasar. "Nunga hupaboa tu Kepala Staff Kodim pangalaho ni si Poltak", ninna tu hami. Ala agen gota do Bapak dohot Tulang, ditanda do Kastaf, ala adong hubungan keluarga dohot tunggane boru ni Kastaf i. Si Longga pe tarsonggot mambege naung dipaboa do parbadaan ni si Poltak dohot si Leo.
Sai hupamanat bohi ni paribanki, sai ditiop uluna, engkelna pe tata, satongkin lao tu dapur mambaen tes, alai sai dipanotnoti galas nai so apala diinum. Satongkin lao tu topi dalan, mamereng jolma mancuci baju di aek godang, hundul muse di tangga ni jabu. Manjangkit jambu muse dialaman, diputik ma parbue ni jambu natata dope, diharat saotik, dileon tu au.
"Ingkon paima on do marrara, ala manis do jambu aek on", ningku.
"Au nunga tammat esema, nga masak, ma boi muli", ninna mangalusi. Hape soadong hatakku mandok muli.
Huboto imana marungkil taringot tu nanaeng tukar cincin i. Hubuat ma dua helm, hupangolu motor, huorahon ma imana lao. Ndang diboto manang natudia hami, hupagogo ma gas ni motori, mangalewati RRI di Simaremare torus nakkok lao tu dalan na tu Barus, mangalewati topi laut, bahat harambir ditopi ni laut, berengon ma pasir namansai bontar, ias, adong galumbang margulung gulung tu topi laut. Adong jabu ni pardekke jonok tu laut.
Alai dang maradian hami disi, si huhatop, dihaol ma gontinghu gogo, unang madabu.
Tompu muse hurem ala adong lubang, lam dipagogo manghaol. " Abang nakal, biar ma madabu au laos mate, asa sonang hamu sude, stop stop", ninna".
Maradian ma hami jala hundul di batang ni harambir naung mate miring jonok tu aek laut. Boi ma manggoyang goyang pat dibatang ni harambir i.
" Ma semester piga haletmi bang", ninna mandodo rohangku. Tung dihilala do huroha naung mardongan dongan au di Yogja.
"Ndang adong hallethu ba, holan mardongan dongan do somal do songoni kan", ningku margabus. "Anggo ho nga lobi sian mardongan dongan dohot si Poltak na ganteng i", ningku.
"Si Poltak nga didok holongna tu au, alai ndang hualusi dope, hudok paima jolo lulus au esema". Ndang apala tarsonggot be au ai nunga ditaringoti si Jojor.
"Boasa sai sip Abang ndang cemburu", ninna songon na heran.
"Hape Abang so hea mandok holong roham tu au", ninna. Songgot rohangku mambege hata nai, laos madabu kunci ma ni motor tu laut. Hatop au manimbung, unang sanga diboan galumbang i tu tonga tonga.
Roma au muse tu batang ni harambir i.
"Botimai adek sayang", huhut hubaen tangan siamunku tu abarana. Dipasombu tanganki disi.
Huuduti muse :"Ta oloi ma tahi ni Inang dohot Tulang i, ba bolo rongkap, marpesta godang hita, alai molo tu si Poltak do rongkapmu, ba putus pe partunangantai tai", ningku. Sahalion masitiopan ma jari jari nami.
"Gabe bingung do au, maksud ni Abang aha do sabotulna. Dung sae tukar cincin, mangalua hami, ido maksudmu ?", ninna
"Ai mangalua do horoha rencanamu ?", ningku muse, gabe busisaon au.
"Atek na salah langka do hamu ?", ningku.
"Abang jahat, jahat. Dang songon na dipingkiri ni Abang i", ninna huhut sai dipukkuli au. Madabu ma hami tu topi ni laut i, masi tindian. Untung do dang maraek hona aek laut.
"Na manungkun do au, atik beha", ningku muse huhut mengkel.
"Botul botul do abang parsingkola ba, ganjang hian fikiranmu", ninna huhut dihaol gontingku, huhut mardalan tu motor, mulak tu jabu di singkola tukkang. Minar bohina pajumpang dohot Namboruna siala rencana nami, andorang so hupataru mulak tu jabuna di Simaninggir.
"Nunga didok Bapakmu, saminggu dung taon baru ma na tukar cincin i, dijabuon, andorang so mulak paribanmu", ninna inang tu maenna. Dang pola dia hata ni si Longga, holan mengkel :"Olo namboru", ninna jempek.
Si Poltak tong dope ndang ro mangido maaf, mungkin ndang dijou Komandan nai dope ra. Manang ndang pola dia dia molo marbadai angka naposo. Ndang apala huboto. Alai tingki tukar cincin i ndang ro Ibana. Dang barani ro manang nadiorai si Longga, ndang huboto. Mabiar ra gaor annon acara i.
Holan dongan ni si Longga do dohot sisolhot na mansai jonok na diundang ro. Ndang adong hula hula na ro, ala so pesta adat goarna.
Tingki mandok hata jongjongg ma au dohot si Longga, hudokma songonon :
"Mauliate ma dihamu ala ria ro tu acara on. Dung habis mangkatai annon, baen hamu ma lagu i dongon parmusik. Adong saotik perobahan acara, ia acara tukar cincin borngin on ndang saut, ditunda ma sampai lulus au", ningku.
Siip sude natorop. "Tapi bang bukan begitu.........", ninna si Longga bollang matana mamereng au.
Gaor ma, ribut ma suara, mar macam macam.
"Baen hamu ma ende i, bagi hamu ma sipanganon", ningku paula naso adong dia dia.
"Pa, pa, kenapa pa ?", ninna si Jojor mamereng Tulang pingsan diabingan ni Nantulang. Nunga leleng darah tinggi do Tulang i
"Hatop boan tu Rumah Sakit", ninna angka suara.
"He he ma Amang lao tu mobil, naposo ma mangabing Tulang".
Inang pe tangis, mangangguhi diapuli ibotongku.
"Boasa dipaila ho hami dohot Amangmu Leo", sai ninna.
No comments:
Post a Comment