NOVEL PHP : 1. PARIBAN

 
TELUK TAPIAN NAULI, SIBOLGA

Dakdanak dope au dohot paribanku si Longga dohot anggina si Jojor nunga mardongan dongan hami. Tung holong hian do roha ni Tulangna tu iberena. Bere naipe sai malungun do tu Tulangna na tinggal di huta Simaninggir, 10 kilometer sian Sibolga, di dolok.
Molo pakansi sai tu jabu ni Tulangna do parjolo dilojongi, ai ido hata sipaingot ni inang, ingkon sangap do baenon Tulang.

Hea piknik hami tu topi laut di Sibolga, tu Salib Kasih di Tarutung dohot tu pulau Samosir sai rappak do keluarga ni Tulang dohot keluarga nami.
Tingki marmeam meam di topi laut Pandan, marsilelean dipasir na bontar i, ditanom bandanna dipasir jala marlange dipinggir laut. Tompu ma ro galumbang diboan ma si Longga tu tonga tonga jala mogap ogap manginum aek laut. Jala lonong ma ibana. Huhatopma marlange hutangkup ma ibana jala huboan ma tu topi. Hupabalik ma bandanna huhut huangkat pas dibutuhana aso kaluar aek laut nani inum nai. Alai tong dope si Longga ndang marhosa.
Hupabalik muse bandanna, dipompa butuhana, tong ndang marhosa jala tartutup simalolongna.
“Isap, isap”, ninnna natorop. Huisap ma aek sian bibirna sahali, dua hali ipe aso batuk batuhon ibana jala dibukka simalolongna, huhut tangis.

Molo margait gait hami, au jotjot do mandok :”Diingot ho dope tingki na lonong ho di laut”, ningku. “Abang jahat, Abang jahat”, ninna si Longga huhut masilelean manang didanggurhon aha na adong dilambungna. Jala sai marrara ma hurumna na bontar i. Lam bagak idaon.
Songoni do tingki manakkok lao tu Salib Kasih sai masitiopan do hami, sipata hundul maradian di bangku na adong disi mangalap hosa. Sai hulap do hodok ni Longga, ibana pe dang pola diorai. Jala sai dao do hami nadua dipudi naasing.

Tingki naung SMA au jala SMP si Longga, jotjot do manakko nakko motor ni Ibotokku lao manaruhon si Longga mulak sian singkola tu hutana. Hape dalan tu Simaninggir I mar belok belok, soppit do dalan i. Jadi sai dihaol si Longga do gottingku mabiar madabu, ai rura na bagas do dihambirang ni dalan i. Sahat tu kilometer 9 maradian do hami manatap laut di toru dihadaonan, paimahon mata ni ari marrara lao bonom tu ujung ni laut. Angin mangombos obukna tu bohikku. Hmm huncus.

Ala bajar dope si Longga, ndang hea dope hudok hata na adong rohakku tu ibana. Mandok holong ?. Ndang huboto holong do manang na holan sonang ni roha. Ba sai hupahusor husor ma I dibagasan rohakku. Nangpe sngoni saleleng naon ba sai sonang do roha ni si Longga molo rap hami nadua. Alai boha rohana tu au, ndang huboto, ala mansai bajar dope ibana.

Ndang parbinotoan name, diparate atehon Tulang dohot inang do songon dia pargaulan nami namapariban i. Jadi marsakkap ma nasida, Tulang dohot inang, ibotona, molo dung magodang nasida, ba tapasauton ma nasida nadua. Alai ndang dipaboa nasida tu hami nadua.

Sahat ma tingkina borhat ma au marsingkola tu Yogjakarta, si Longga nungga kalas tolu SMP tingki i. Dipataruma au tu bandara FL Tobing borhat tu Jawa. Sude ma hujalang jala huumma i. Tinggal si Longga ma parpudi. Maila au mangumma, holan masijalangan ma hami. Hudok ma jonok tu pinggol na :”Unang lupa ho tu au da”, nikku. Holan mengkel supping di ibana. Namaila do, sungkun sungkun rohakku.

MARSAMBUNG