TOKKE NAPOSO (11)

TU SINGAPUR MANDIORI PANUHOR           


Tarutung, malamun 70%

Nungga 6 bulan si Tumpak na maminjam sian Bank jala omzet ni tiga tigana pe ma martamba balgana. Gota nadi tuhor ma sahat 2 ton sa minggu ala onan panuhoran pe ma lam dao sahat tu Parsingkaman, Tapanuli Utara, 7 kilometer do sian onan Sitahuis manang 30 kilometer sian Sibolga.
Ala ni i lao ma ibana pajumpang dohot kapala Bank, didokma :"Boi do martamba kredit hi ?", ninna.
"Sadia horoha pangidoanmu ?".
"Molo boi nean Rp 10 juta nai asa hututup, hulunasi utanghu tu tokke Rp 5 juta, asa gabe sada di bank". Dung dijaha kapala bank i transaksi ni Tabungan na di Komputer, pintor mengkel do kapala bank i. "Boi mai, alai ta alap majo Sertifikat ni jabumi sian kantor BPN ate". Ma gabe borg toko ni si Tumpak, alai saleleng on, diproses kantor BPN do Sertifikatna.
"Marsogot ma hamu ro muse dohot sude pengurus ni CV, manekken Surat perjanjian kredit".

Ari Sabtu arian tingki manggadis 1 ton gota ibana tu tokke A Kiong marasam mai Rp 7.500.000, didok ma tu si Su Lian :"Rp 2.500.000 pe hujalo do da, hugarar ma utanghu si Rp 5 juta i".
"Ah unang pola garar saonnari"
"Ma dapot au utang sian Bank, ma tamba modalhu"
"Alai tong do tu hami ho manggadis gota kan ?"
"Oh pasti do i", ninna, alai dibagasan rohana, lomo na tudia manggadis, ise na ummarga, ba tusi,

"Maridi ma hita annon potang tu Hotel di Pandan da?"
"So huboan saloar pendek hu"
"Ta tuhorhon jo annon di toko i, mura mai"
Dioloi si Tumpak ala adong bisnis na porlu sihataanna, atik beha boi patuduhon dalan si Su Lian.

Marlange ma nasida di kolam, adong do piga piga halak na tong marlange potang ari i, alai ndang apala pola ribur. Sipata nga loja, maradian ma di topi ni kolam alai dibagasan aek i dope.
"Lian, dihuta bahat do tarutung dohot lansat, ndang boi gadisonta i tu Singapur, ai di huta argana so sadia, molo musim na olo do moru sian Rp 15.000 gabe Rp 5.000 ?"
"Malo do ho ba, ido baen na lomo rohangku mamereng ho"
Disiramhon si Tumpak aek tu bohi ni s Su Lian. Mogap ma Su Lian jala disiramhon Su Lian muse. Mallange ma muse nasida tu toru n kolam i masilelean. Dung mullop tu topi ni kolam manghatai ma muse nasida.
"Songonon ma i,lao ma hita tu Singapur, mandiori panuhor"
"Ma denggan i, ho majo lao, so adong dope pasporhu"
"Ba na serius doho, ba urus ma antong, asa lao hita.

Dung sidung passport i, saut ma nasida lao tu Singapur, borhat sian bandara FL.Tobing di Pinangsori.
Ndang apala dipaboa si Tumpak tu si Jojor ai holan 2 ari do nasida lao, borhat ari Sabtu, mulak ari Minggu.
Di ari Sabtu i pintor lao do nasida tu Supermarket dohot tu lapo lapo buah, sude na ngali mar AC. Loja do nasida na masuk haluar tu lapo dohot supermarket, huhut pajumpang tu nampunasa. Ala singkola di Singapur do Su Lian malo do mar hata China dohot Inggris. Dapot nasida do na olo manuhor tarutung nang lancat.
Molo tarutung, na malamun 70% ma dibonana, annon malamun di toko do i. Dungi ditongos mai sian Sibolga tu Medan torus tu Singapur dibagasan Container na ngali, mar AC.
Anggo lancat boi ma i naung malamun tongoson


                         Lancat Sibolga

Malam minggu i mardalani ma nasida nadua kaliling di Singapur. Tarhatotong ma antong mata nisi Tumpak mangida angka jabu na nmartingkat tingat timbo na, motor na jeges jeges, ndang adong namaradian ditonga dalan. Dalan dohot alaman sude ias. Nunga potang nasida sahat tu hotel. Pintor tu bilut ni hotel ido nasida masuk. Mallobok taroktok ni si Tumpak marnida gelleng ni motor sian lantai 17 bilut nasida i, sai songon korek api. Dungi dung sai maridi, mondok ondok ma nasida ala ni lojana. Dipapeak Su Lian ma dipodoman di bilut, alai anggo si Tumpak di karosi tamu do ibana peak.

Dung pukul 9 borngin ala male tardungo ma si Su Lian.
"Dungo ho asa lao hita mangan, ma male butuha" Ndang dihotel nasida mangan alai taripar di bariba ni hotel ido bahat lapo si gadis sipanganon. Ala malam minggu, ribur dope dalan, tingki marrara lampu, taripar ma nasida, didalan na adong cet na bontar mar garis garis, zebra cross ninna goarna. Gomos do ditiop si Su Lian tangan ni si Tumpak.

Ari Sabtu HP ni si Tumpak ndang boi marsambung, di luar area, ninna. Ala busisaon, disangahon si Jojor ma tu lapo ni si Tumpak, sidalian mangisi bensin.
"Di jabu do abang namboru ?"
"Ndaong, lao tu Singapur dohot Su Lian"
"Andigan mulak ?"
"Marsogot, apala adong na porlu ?"
"Ndaong namboru, mauliate, lao majo au".

Ari Minggu potang nga sahat nasida mulak sian Singapur. Borngin i disangahon si Tumpak do tu jabu ni si Jojor.
"Horas nantulang, di jabu do si Jojor ?"
"Di jabu, masuk pahundul jo da"
Tok tok tok "Jojor ro si Tumpak"
"Olo mak".
Alai ndang gira haluar, adong do saparopat jom leleng na. Na maridi dope ra, ninna si Tumpak dibagasan rohana.
Tok tok tok "Jojor ma sai paimahon si Tumpak"
"Olo satongkin nai"
Ujung na haluar ma si Jojor tu bilut tamu, bohina asom idaon.
"Mulak ma abang, hansit ulungku, naeng modom jo au"