Nunga piga taon perlombaan sepeda international dibaen halak minang dihutanasida di danau Singkarak dohot nahumaliang diihuti 22 grup sepeda, 10 mai sian sileban, Jepang, Iran, Malaysia, Belanda dohot naasing. Namonang dilean hepeng mansai balga,Rp 750 juta, ido alana ganup ganup taon martamba do ro grup sian luat sileban.
Parlombaan on nadaoan, 551 kilometer, dibaen ma piga piga ponggol (etappe) marputar putar do on sian luat nasada tu luat naasing, bahat luat, kabupaten nadibolus. Dibolusma saba, jabu jabu minang, huta huta, tortor minang, gok jolma mamereng. Televisi ro do sian huta sileban, huta ni par grup i sude, gabe tontonan ma danau Singkarak nauli i diportibion.
Sian dia do dibuat nasida hepeng US $ 90.000 lao manggarar hadiah dohot ongkos ongkos ni panitia mambaen sude gaba gaba, sipanganon ni sude. Dung hujaha sian dia puro puro nasida ima Anggaran sian sude huta Kabupaten nadilewati ditambah muse sian anggaran Pamarentah Propinsi dohot anggaran sian pusat, Departemen Pemuda dan Olahraga.
Anggo songoni boasa dang boi hita dohot dongan Panitia perlombaan Sepeda naung adong mambaen sisongoni. Apalagi nuaeng nunga adong Badan Otorita Danau Toba. Ummora do hutanta sian huta ni parminang. Luatta ummuli do sian huta nasida. Idama ulini dalan andorang so tao toba manang dung salpu parapat. Ida hamuma dalan namarbelok belok 10 kilometer manangkok sian Sibolga. Molo ro par TV sian luat sileban, gabe lam tarbarita ma hutanta, lam bahat ma turis ro mamboan dollar.
Molo boi TOUR de TOBA dimulai ma borhat sian Sibolga lewat batu lobang tu Tarutung, Siborong borong, Balige, Parapat sahat tu Medan, 365 kilometer. Boido sahat tu tana karo dohot Simalungun.
Huta Kabupaten nadilewati margugu ma antong mananggung sude angka ongkosi.
Santabi tu angka dongan dipartukkoan nanihormatan, on naboi ulahononta ?. Unang nean tadok sega do dalan, juara korup do hutanta, dang ulaontai, ulaon ni pamarenta doi. Ra naboi baenonta tarsongononma, ditambai dongan aha nadumenggan : mambaen surat ma hita tu pamarenta Kabupaten di hutanta be asa olo mambaen Tour de Toba songon nadibaen diluat naasing songon Tour de Singkarak, Tour de Java, Tour de Flores.
Adong muse mambaen surat tu Pemda SUMUT Dinas Pemuda dan Olah Raga dohot Dinas Pariwisata dohot surat tu Kementerian Pemuda dan Olah raga dohot Kementerian Pariwisata.
Au ma mambaen surat tu Kementerian dohot tu Bapati dihuta nami Kabupaten Tapanuli Tengah dohot Kotamadya Sibolga.
Beha do dirohamu amang na manjaga pintu ni harbangan na uli on, ajari, togu togu hamu hamu hami antong sisean muna on.
No comments:
Post a Comment