NOVEL PHP. 2. TUNG MASIHOL

                                                            Pantai Sibolga

Dung sahat tu Yogjakarta, tung heppot do na kuliah I, aso unang maila iba, halak Batak, hatinggalan sian halak, na malo maloan angka dongan sian singkola nadi kota kota besar. Manjaha sa lembar bahasa Inggris olo do sadari huhut maos manjaha kamus. Eh tahe.

Sai sungkun sungun do si Longga, didok songonon”di BBMna :
“Bang, boasa ndang dialusi ho BBMhu”, ninna.
“Sorry adek, Abang lagi sibuk kali”, ningku  huhut huuduti :
“Sipata manogot ro BBMmu, tingki kuliah au, anon borngin ma narohangku, hape lupa”, ningku mangalusi.
“Ai naung adong do ra halletmu”, ninna muse. Dibaen muse gambar na mengkel hira namangalesengi.
“Ai honian”, ningku jempek mangalusi.

Songoni do huraho borua,tung sensitive do pangkilalaanna, diboto do naung mardongan dongan iba dohot dongan mahasiswa. Boha ma baenon ai hundul pe iba sipata dohot boru Jawa sian Solo, na mansai lambok pangkataionna. Manang boru Sunda dohot boru Bali na gait pangeol eolna, boru Yogja namar kerudung.
Adong do nean manang napiga boru Batak, alai sa mamillit millit, iso do parhepeng na boi mamboan manonton malam minggu. Ise na rajin ro tu asrama mamboan sipangano, ba ima parjolo. Jadi godang ma dongan namardongan dongan dohot boru Jawa, ala sai lambok hatana jala sai si pangoloi. Ndang songon boru Batak, ala boru ni Raja ingon nisomba.

Di mulana, denggan  do komunikasiku dohot si Longga. Alai dung ma sataon, gabe humurang. Dung muse dua taon ndang hea be hami mar BBM, SMS manang martelepon.

Hea do sahali hutelpon hudokma :“Aha do kabar adek”, ningku. “Ai diingot ho dope au ?”, ninna mangalusi.
“Ai nung adong do huroha hallet mu, so hea beho martelepon ”, ningku huhut mengkel.
“Molo adong boha huroha, ise namuruk”, ninna mangalosi tondos.
“Abang pe nga adong halletmu disan”, ninna.
“Ndang adong, ndang adong”, ningku tar hatop mangalusi, margabus.
“Ari pesta on mulak do au, jemput di bandara da ?”, ningku.
“Olo bang, dohot do hallet mi ?”, ninna margait gait.
“He he he”, ningku jempek mangalusi.

Dung tolu taon dung hutinggalhon Sibolga, hutinggalhon si Longga. Denggan do sikkolaku, nunga sai Semester onom, ndang leleng be aso mamakke toga. Jala nunga tung masihol roha tu pariban dongan magodang. Umma on na do au ulaning molo pajumpang, ninna rohakku dibagasan.

“Sebentar lagi kita akan mendarat di bandara F.L.Tobing, Sibolga, harap pasang seat belt dan tetap duduk sampai pesawat berhenti dengan sempurna”, ninna pramugari dohot logat Jawa.
Huida Amang, Inang, Iboto dohot paribanku si Jojor ma paimahon di bandara.
Masijalangan, masi ummaan. Alai ndang tarida paribanku si Longga. Ai sai sip do au ndang husungkun. Alai diboto si Jojor do nadi bagasan rohangku ninna :”Bang, kakak ujian sadarion, ndang boi dohot”, ninna.
Holan mengkel do au mangalusi. Huingot do hatana na mandok :”Molo adong hallethu beha huroha”.

Lewat ma hami sian topi laut Pandan, disima na mogap si Longga diboan galumbang jala huisap aek siang bibirna ipe aso tarjolma bana. Dipardalanan, marangan angan marningot hami hundul dipinggir laut Sibolga, holan paima ima mata ni ari marrara ganjang sian mataniari nanaeng lonong tu ujung ni laut. Disima hami hundul uhut mangallang kancang, ndang mangkatai. Ndang huboto aha do dibagasan roha ni si Longga, ala tingki i  ibana bajar dope, jala uli.

Diboto inang do tong aha na adong dibagasan rohangku, ala sai sip au, ninna ma :”Marsogot hita tu jabu ni tulangmu di Simaninggir, paribanmu nuaeng nga balga, uli muse”, ninna. “Olo inang”, ningku. Najolo pe uli do ditingki dakdanak, ningku dibagasan rohangku.
Ai ido tona ni inang, ingkon sangap do baenon Tulang. Hasomalan nami doi molo dung pakansi ingokon tu jabu ni Tulang do parjolo baru pe lao manang tudia.

Simaninggir on, inganan ni pambarontak PRRI do on najolo taon 1958 - 1961, ala boi tangkas manembak bom tu Sibolga, ala tangkas tarida tu toru, 9 kilometer daona. Mambarontak pe Kolonel Simbolon tingki i ala tong sai pogos do halak kita dung 10 taon mardeka, hape Sumatera tung mansai mamora. Dang adil Pamarentah Pusat. Bahat do angka doli doli par huta didolok on na hona tembak tentara Divisi Siliwangi sian Jawa Barat.

Holan hami natolu do lao tu Simaninggir. Amang do mamboan mobil, ai mabiar au mamboan sotung madabu annon tu rura na mansai bagas. Ai dalan pe sompit marbelok belok, Molo adong mobil sian ginjang, ingkon maradian aso boi mobil sian toru torus mardalan.
“Diingot ho do kan Leo, molo adong Pariban, ido parjolo sian naasing?, ninna Inang.
“Ah adat na jolo doi, nuaeng nunga maju”, ningku mangalusi.
“Ai lam uli do pariban mi nuaeng”, ninna Amang muse mangondolhon hata ni inang.

Tingki sahat hami, marhobas do nantulang dohot si Longga mambaen sipanganon arian i. Ndang lupa loppan lomo ni rohangku dekke dipanggang pacak, dibaen bumbu harambir, kunyit. Nga rade dohot lasiak disseat seat dicampur dohot asom, bawang dohot kecap asin. Diallang tingki las……..songoni ma tabona. Untabo sian sipanganon di kapal habang.

Dung sidung mangan, marnonang ma nasida muse taringot tu sikkolakku di Yogja, sangkap ni si Longga lao marsingkola dohot naasing. Dungi ditinggalhon ma hami huhut dipature angka pinggan,  galas, parburian diboan tu pudi, dirupi anggina si Jojor.
"Dohot maho tu Yogja, asa rappak hita", nikku mulai pangkataion.
"Tu Medan do au bang, ndang adong hepeng", ninna alusna.
"Ah bahat do hepeng ni Tulang", nikku muse, huhut ma husungkun :
"Nga adong halletmu ?", ningku.
"Bang, sai holan i, mardongan dongan, kan ndang salah, asal unang manegai tu parsingkolaan", ninna.
"Huk huk huk, nga adong halletna bang, tentara ", ninna anggina si Jojor huhut batuk batuk.
Diuduti muse :"Diingot ho dope bang na lonong ibana di laut", huhut marlojong tu jolo.
Didanggur si Longga ma anggina i dohot kaccang.
"Toho doi ?", ningku. "Holan mardongan dongan do bang", ninna huhut matana mamereng tu toru, tu lage. Huboto na margabus ibana siala pangalahona i.

Marcarito ma ibana bea marsitandaan dohot si Poltak, sersan mayor di Kodim Sibolga. Si Poltak na mangajari murid SMA gabe pangibar bendera merah putih, Paskibara. Tingki latihan, pingsan ma si Jojor, ba laos si Poltak ma mangabing tu pos kesehatan na adong di sikkola i. Dung tabo pangkilaanna, dipataru ma mulak marmotor tu Simaninggir. Dung sian i ma si Poltak jot jot ro, tarlobi molo malam minggu.
Nga hubayangkon jot jot ma ra ditaruhon si Poltak si Jojor mulak tu Simaninggir. Sai dihaol ma ra didalan na marbelok belok i, aso unang madabu. Baru pe nuaeng adong pangkilaan holong tu si Longga. Tingki SMP ibana ba holan na lomo do roha molo jonok tu ibana. Ndang hea dope adong panghilalaan holong, cinta.

Dipardalanan mulak tu Sibolga disukkun inang :"Boha do ?".
"Boha aha", ningku manungkun muse.
" Lam uli do kan ?", ninna huhut mengkel. Tarida iponna marrara alani napuran. Botul do nadidok ni inang i, lam mokmok, lam bagak, ganjang muse obukna. Ndang songon anggina sai hira baoa.
"Molo olo ho aso tahatai", ninna inang muse.
"Unang songoni, ai nunga adong donganna, tentara", nikku.
"Muramai, huhatai hami pe tu Tulangmu", ninna amang mangondolhon.
"Mangkatai aha", ningku.
"Martunangan", ninna Amang muse huhut diserbeng inang.
"Ha ha ha", mengkel au tung gogo, ndang mandok olo manang daong.
"Bereng dalan i Amang, sotung madabu hita", ningku aso torus dibereng tu jolo tu dalan na marbelok belok i.
 Sabotulna las do rohangku molo martunangan hami, alai marningot naung mardongan ibana tu si Poltak. Ra nga tu si Poltak rohana, ala nunga ditanda imana dung ibana magodang. Ma ditanda holong, cinta.

Ari Sabtuna i lao mau au tu Simaninggir, sahali on sahalakku do.
"Horas Tulang", nikku. Mengkel Tulang huhutmanjou :"Longga ro Abangmu", ninna manjou buha bajuna i. Dung marnonang satongkin dohot  nantulang dohot si Jojor, huorahon ma si Longga lao tu toruan, tu paradianan na adong papan tarsurat "Pemandangan indah". Ndang tabo mangkata i dibege Tulang, Nantulang dijabu.

Hundul ma hami nadua pajonok jonok. Angin pe gogo, sai habang ma obukna i tu bohingku. Huncus.
Tarida ma dua dinadao dua pulo na balga, songon benteng aso unang hona galumbang tsunami Sibolga, songon pulau Nias ndang pola dao sian Sibolga.
Sian dolok on tarida ma teluk Tapian auli, botul botul uli songon goar nai. Marhillop hillop ma angka lampu lampu ni karamba dohot angka parau, ala nunga jonok potang ari.

Hupajenek parhundulhu, husungkun ma si Longga gomos "Longga, sahali on alusi ma sasintongna da !", ningku.
"Songon na serius do abang, didia do engkel mi", ninna.
"Namborumu.......namborumu mandok hita naeng tukar cincin, diboto ho doi ?'", ningku.
"Olo bang Bapak pe nunga hea ditaringoti tu au", ninna mangalusi huhut dibereng tu langit, bintang mulai haluar sada sada. Ra manahan unang ro iluna
"Ndang didokkon ho naung adong donganmu", ningku muse.
"Nunga bang, alai nunga marsangkap Bapak dohot namboru, naeng pasauthon hita", ninna huhut tanganna mangosok gosok matana. Hutiop ma tanganna gomos aso unang marrsak ibana.
"Ai anggo sarsan mayor dope pangkatna, ndang mungkin i gabe kmandan Kodim adek", ningku mandodo rohana.
"Ai naeng sikkola Secapa, calon perwira ibana bang tu Medan", ninna. Ndang tangis be ibana, alai songon na mengkel mangingot gabe letnan haduan si Poltak molo dung sae pendidikan.
Ndang olo talu, hudokkon : "Molo dung S1 Abang, denggan karejokku, olo do ho gabe ripe ni Pejabat", ningku mengkel gogo.
"Ai sai ido didok Bapak lomo rohana au marsedan marberlian:, ninna huhut ditiop uluna songon na mamikkiri borat ni sipilliton ni rohana.

"Rrrr...rrrr", motor maradian dipudi nami. Adong naro marpakkean tentara. Hatop hutarik tanganku.
Ro ibana pajonokkon. "Poltak", ninna patandahon goarna. "Leo", nikku. Dijalang tanganku mansai gogo.
Huberen jom ditanganku, pukul 5.30 potang.
"Beta mulak", ningku.
"Mulak sian on ma abang, au mulak dohot si Poltak", ninna.
"Ndang boi songoni, au mamboan ingkon au do paulangkon, ido aturanna", ningku.
"Suru ma imana mulak, tung so diboto aturan", ningku gogo.
"Aha nimmu, ndang huboto aturan ?", ditiop bajungku.
Hu dorong tanganna sian bajungki, huhut hutinju bohina. Tarsonggot ibana ndang dirimpu barani au tu tentara. Ditinju muse bohikku. Gabe gabe masihaolan hami sampe madabu.
"Stop, stop, ndang dakdanak be hamu", ninna si Jojor muruk hian.
Jonjong si Poltak, dipaias pasir sian saloarna, lao tou motorna, jala di gas gogo huhut krikkk mangkuling ban ni motor i, ala songoni ma hatopna, mangebut.

Hami pe manangkok ma tu mobil, jala hubelokkon hambirang, tu toru tu Sibolga.
"Tudia Abang", ninna si Longga.
"Tu Sibolga, mangkatai tu namborum", ningku.
"Mulak, mulak bang", ninna huhut ditiop stir ni mobil.
"Plaaaaak....mobl maradian dung manabrak batu, topi ni dalan. Anggo so adong batu i nunga madabu hami tu rura, jala holan goar nama na tinggal.