TOKKE NAPOSO (9)

MANGURUS KREDIT TU BANK

Ari Sinen i lao ma si Tumpak dohot si Longga tu Bank tu Sibolga, tu Bank na met met Bank BRI Unit Singamangaraja. Tusi do didok Abang nai molo gelleng dope kredit, ndang tu Kantor Cabang na balga i jonok ni Tangga saratus i.

Mangkatai ma uluan dohot Mantri ni Bank i dohot si Tumpak, dohot do tong si Longga mambege ala dirimpu nasida ibotona manang hamlet na. Disungkun ma sude hatorangan naporlu, tu aha porlu ni utang i, sadia pangidoan na, adong do borg na, sadia leleng naung martiga tiga, tudia digadis gota i dohot na asing.

Dilean si Tumpak ma surat surat ijin usaha, ijin tempat usaha, NPWP, Akte Notaris. Dilean muse Surat sian Agraria patoranghon naung diukur tano i. Uluan ni Bank i manungkun:"Sadihari sidung Sertifikat ni tano on ?", ninna. "Hatop haluar ma i nnna", ninna si Tumpak mangalusi. Dipangido Buku Tabungan ni si Tumpak lao di foto copy.

"Imana pe naeng mambaen buku Tabungan ni Tulang i, alai huboan hami majo formulir na asa diisi", ninna si Tumpak. "Nangkin nahurimpu do ibotomu manang na dongan dongan mu, ninna Mantri i huhut manerbeng si Longga. Si Longga pe gabe maila ndang dibereng pardompahan ni Mantri i "Ro pe au ari Rabu tu Simaninggir asa huida usaha muna i", ninna Mantri Bank i manimpuli panghataion.



"Malo do ho ba bang, Bapak naung leleng martiga tiga gota so hea diboto tu Bank,, Tabungan nape so adong, abang satongkin dope ma mangido utang tu Bank", ninna si Longga huhut mardalan nasida tu alaman lao manaek tu motor. "Ingkon ringgas do iba marsiajar Longga, manangi nangi sian na ummalo", ninna si Tumpak huhut dilean sada helm tu si Longga asa dipakke.

Botul ma tutu roma Mantari i mamareso jabu ni si Tumppak, dibereng muse adong 2 toko na baru be dipajonjong, di hambirang ni jabu i bahat rumang ni boniaga na. "Didia do gota si 1 ton i disimpan hamu ?'. ninna Mantri Bank i. Dipatorang si Tumpak ma di ari onan, ari Sabtu ditulak, digadis do gota na sa ton i tu Sibolga, molo adong pe gota saotik di gudang ala na adong do halak porlu hepeng digadishon saotik. Anggo somal na tingki ari Sabtu do panderes gota i manggadis jala pintor nitulak ma i tu Sibolga.

"Sadia ma porlu modal sian Bank", disungkun Mantri i. "Molo boi nean Rp 10 juta asa boi manuhor tu huta na asing, tu Sitahuis sahat tu onan Parsingkaman, molo 2 ton ma marasam Rp 15 juta", ninna si Tumpak, ala i dope parbinotoanna. Ndang diboto songon dia par Bank mangetong i. "Piga ari asa digarar tokke manang fabrik", ninna Mantri i muse. "Somal na saminggu, hea do 2 minggu", ninna mangalusi. "Molo borg na jabu dohot tokko on ma ate, motor i dohot do ?". "Anggo motor i kredit do i lae", ninna si Tumpak tar maila pardompahanna. Sungkun sungkun parpudi :"Tokko muna on sian dia do modal na ?", ninna. "Oh i na kongsi do au tu halak China, anggo barang i, konsignyasi doi, dung lakku pe asa ginarar", ninna si Tumpak mangalusi.

"Ma sae jo sadari on, molo adong nahurang hupaboa pe muse, ai so jo formulir Tabungan ari Sinen i beha do saut na", ninna Mantri i. "O, ama ni si Longga, maradian ma lae annon di jabu na balau dung tekongan i dihambirang ni dalan, sungkun lae ma disi", ninna si Tumpak.  Ditinggalhon ma inganan i, jala maradian ma ibana tutu di jabu ni si Longga. "Horas, boi pajumpang dohot si Longga inang, au sian Bank", ninna Mantri i. "Masuk hamu, Longga adong ro sian Bank", ninna nai Longga. Dung masijalangan dohot si Longga disungkun ma :"Ma diisi hamu formulir i ito ?', ninna. "Painte jo hubuat satongkin, ma di tekken bapak nabodari", ninna si Longga.

Dipareso Mantri i ma sude huhut dipatudu adong na hurang. Dungi dileon si Longga ma hepeng Rp 1 juta. "Ndang boi jaloonhu hepeng, hamu ma mamboan tu Bank, holan formulir onpe huboan", ninna lambok huhut mengkel, ai holan nasida nadua do di bilut tamu i. Tong maila ila si Longga namanghatai i. "Namanukkun ma jo au saotik, molo boi, songon dia do pangalaho ni si Tumpak diboto hamu ?", ninna Mantri i. Dialusi si Longga : "Najolo tu Bapak do ibana manggadis gota, nuaeng ibana manuhor gota sian tondong dohot dongan sahorong na, ndang digarar kontan, porsea do sude digarar sadari dua ari sahat tu saminggu, molo adong na porlu boras manang miak rupani dilean do marutang".

Holan dua minggu do nunga ro boa boa naung diolopi pangidoan ni si Tumpak alai ndang Rp 10 juta alai Rp 6 juta do. Nang pe ndang haluar dope Sertifikat, ma ditekken be Surat perjanjian dohot Bank. Lao ma nasida na opat tu BRI Unit Singamangaraja, si Tumpak, amang na dohot Ibotona, pangula ni C.V i manekken. Diorahon do tong inang na ala naeng mangan natabo nasida sidung sian Bank i, martangiang ala basa basa ni Tuhan tu nasida.
Sertifikat i molo dung sidung buaton ni par Bank ma tu kantor Agraria ala nunga dilean si Tumpak Surat kuasa tu Bank.

Molo ni ida, gelleng do usaha ni si Tumpak on, alai sabotulna anggo asam ni artana tung balga do. Disurathon par bank ma hamoraon, Neraca didok goarna, tarsongonon ma:

ARTA :
Hepeng                        Rp     350.000
Tabungan di Bank        Rp  2.000.000
Gota di gudang 20 kg   Rp    150.000
Singir                            Rp    400.000

Motor                            Rp  3.000.000
Lapo                              Rp 40.000.000T o t a l                          Rp 45.900.000

UTANG
Bank                              Rp  6.000.000
A Kiong                         Rp  5.000.000
Utang na asing               Rp     500.000
Modal sandiri                 Rp 34.400.000T o t a l                           Rp 45.900.000