TOKKE NAPOSO (3)

DIPASINGOT SI JOJOR

Disi sahat si Tumpak dohot si Jojor pas among na mambukka pintu, disungkun:"Sian dia do hamu mulak borngin?", ninna. "Sian jabu ni namboru do bapak", ninna si Jojor mangalusi langet, ala nibiarna. "Toe ma ari Sabtu naro ndang boi be boanonmu motor da", ninna among nai huhut holom bohina masuk tu bilutna. Masi berengan jala digoit si Jojor ma gonting ni si Tumpak.

Tarsonggot nasida tingki haluar angkang na si Longga na margait i nasida. "Ai borngin ma hamu mulak", ninna. "Abang nangkin mangorahon au mardalani tu topi laut Pandan, maraek bajungku ala tinggang au", ninna mandok nasasintong na. "Hu paima hami mahiang manjomur bajukki, ido baen na borngin hami mulak"?, ninna muse patoranghon.
Ndang na muruk si Longga, ndang na mangiburu, unang sala langka annon anggina i. Ido tong parmuruk ni among na.

Dung dibege among na ditutup pintu, naung mulak si Tumpak, disuru among na ma nasida nadua hundul di bilut tonga tonga dohot inong na mangalean poda :"Hamu nadua ingkon masi haholongan, masipasingotan, unang hita gabe si incahan di huta on, mulak borngin. Ho Jojor, ho sianggian, ndang boi ho mangalangkai kakak mon, ingot da", sai sip nasida nadua mangunduk. Inong na pe mandok hata musena :"Hamu bajar dope, jala naeng singkola do hamu hubege, manat manat hamu namardongan dongan i, au pe lomo do rohangku ingkon singkola hamu, mangaranto, unang sai di huta on, pamanja hu hamu di jolo nami", ninna dohot lambok hata na manganju.
Dung sian sadari i  diorom si Tumpak ma langkana lao tu jabu ni tokke, ama ni Longga. So adong be antong na porlu sai lao tusi ala so tusi be ibana manggadis gota.

Ala so tu tokke ama ni Longga be manggadis gota, diorahon si Tumpak ma angka hombar balok na asa tu ibana manggadis gota, unang be tu agen, tokke na asing. Di lapo parmituan pe diontang do angka par mitu disi dohot dongan magodang na, si Daulat dohot si January asa manggadis gota tu imana. Alai dang sude na olo, alani partuturon tu tokke ama ni Longga dohot ama ni Monang sian Sibolga, manang na adong dope utang nasida tu tokke i.

Marhurang ma antong tokke na asing manuhor gota di huta Simaninggir, ma dibuat si Tumpak piga piga halak. 6 bulan dope gabe agen gota si Tumpak, ma boi dituhor gota 900 kg - 1 ton, panggararan na tong do sadari dua ari dung ari onan. Olo ma sipata mangomo Rp 1 - Rp 1,5 juta juta sabulan, molo so ro udan. Anggo diujung taon ala jotjot ro udan sipata saminggu ndang manderes jolma, olo ma ndang adong panggadis gota. Mangula hauma saotik do mananom eme, bahatan manuan sayur, jagung dohot garikkau.
Ido porsuk ni hangoluon di dolok, di Simaninggir sahat tu Sitahuis. Saba pe so adong, holan sian gota i sambing, ido manuhor boras naro sian Silindung manang sian Balige. Adong do hauma nean alai saotik ni boras na. Molo pe adong pancarian na asing, tingki musim ni tarutung (durian) do dohot lancat (duku).

Ndang holan na mangomo da si Tumpak, hea do 2 hali rugi patimbo hu dituhor gota i, tumimbo sian tokke na asing. Bahat ma antong manggadis tu imana. Tep ma digadis tu si A kiong, turun tompu arga di Singapur, rugi ma ibana. Heado ditahan ibana gota i piga piga ari paima so ditulak tu tokke di Sibolga, ala dietong naeng manaek arga ni gota, hape gabe tutun do, rugi ma ibana. Parsiajaran ma ala poso dope ibana. Alai hea do tong timbo pangomoanna, hea do sa onan mangomo Rp 2,5 juta ala tompu manaek arga ni gota, tingki i ditahan gota i saminggu, sa onan baru pe digadis. Molo adong horong namansai porlu boras, miak, gulo dohot na asing boi ma dibuat sian lapo ni si Tumpak, diparetonghon mai sian asam ni gotana be.

Ndang holan gota be boniaga ni si Tumpak dohot natoras na, di musim udan, dibuhai ma manggadis miak besin, miak tano, gulo dohot boras dijolo ni jabu i, ditopi ni dalan kuli dibaen lapo kios na gelleng. Molo tingki marpabue lansat (duku) dohot tarutung (durian), digadis ma tong di kios i. Marsoring ma nasida manjagai kios i. Bahat do motor dihutai manuhor bensin disi 3 - 5 liter. Saotik dope boras, 100 kilo, mar asam mai Rp 900.000. Miak tano pe holan 2 jerican do. Ima barang na lakku dihuta, molo pe ro udan ma adong haroroan ni hepeng nasida. Anggo tondong, par huta dohot dongan boi do marutang di lapo i, alai digarar lunas ma tingki manggadis gota nasida. Tingki musim ni tarutung dohot lancat, tong do digadis di kios i, angka amang uda, tulang, amang boru dipeakkon do disi.

Maradian ma sada pegawe ni Bank BRI Sibolga, dongan sabutuha nasida mangisi bensin, diida ma adong boras dohot miak tano, jala diboto ma naung gabe agen, tokke gota ibana, didok ma : "Simpan ma kedan hepeng mi di Bank, molo sai ditiop ho annon olo ma mago di dalan, manang ditangko halak", ninna. "Ah usaha na gelleng dope bang, ai pintor gararon do tu angka panderes i, saotik do di iba", ninna mangalusi.
"Ndang ala ni gelleng na, alai porlu do adong buku Tabungan, asa tarida balga ni omzet mu sabulan, huajari pe ho songon dia asa gabe balga tiga tiga mon", ninna huhut diuduti :"Ai songoni do China i daba, sude hepeng na di simpan di Bank do, molo manggarar na balga, dilean check, molo gelleng digarar kontan, jei huboto hami do omzet ni nasida sada sada", ninna.

Dipahusor husor si Tumpak ma hata ni dongan sabutuhana i, dua minngu dung i pajumpang muse nasida mangallang Sate Padang di pasar Sibolga, disungkun muse :"Andigan do buka onmu Tabungan mi", ninna pegawai Bank i muse. Ba habis mangan rap ma hita abang tu Bank", ninna si Tumpak. Diboan ma si Tumpak tu Bank BRI Unit Singamangaraja, Bank na met met i, dibukka ma rekening Tabungan, otik do, holan Rp 250.000. "Roma ho muse minggu naro da asa huajari ho mamakke kartu ATM", ninna abang na i. Kantor ni Bank on jonok tu jabu ni amang boru ni si Longga, tokke gota, ama ni Monang.

Dung mulak sian Bank, adong dope pangomoan na, lao ma ibana tu toko dituhor  ma TV songoni nang dohot parabola asa adong halilian nasida di jabu. Gabe sihataan ma si Tumpak on di huta i sahat tu Bonandolok, huta hombarbalok naung mambaen lapo, kios ibana asing sian agen ni gota.

Ala ni mamuhai kios i,  so hea be ro si Tumpak tu jabu ni si Longga, marbonsir mai sian namuruk i tokke i ibana mulak borngin dohot si Jojor. Sungkun sungkun ma among na :"Aha do khabar ni si Tumpak, so hea pajumpang au", ninna tu buha baju na i. "Ndang huboto bapa, lao pe au tu jabuna", ninna mangalusi.
Marsogot nai, ari Jumahat lao ma si Longga tu jabu ni si Tumpak. "Horas namboru, dijabu do si Tumpak ?", ninna manungkun. "Di jabu do, masuk ma ho maen, ninna. Disi pajumpang dohot si Tumpak disungkun ma :"Boasa ndang hea ho ro tu jabu bang, dilului Bapak do ho", ninna. "Na alang do roha mangida tulang i, Longga", ninna mangalusi. "Marsogot, manonton ma hita da, adong film Korea na baru", ninna si Longga. Tangkas do diboto si Longga anggo among na lomo do rohana mamereng si Tumpak.

Ari Sabtu i saut ma nasida natolu manonton tu Sibolga pukul 5 potang, unang pa borngin hu mulak. Diorahon nasida ma dohot si Leonard, pariban ni si Jojor dohot si Longga. Ido tona ni Bapak na asa adong dongan ni si Jojor, pariban nai, ai manghirim do namboruna sada maen nai saut gabe parumaen na. Dungi asa boi si Jojor dao sian si Tumpak, ima roha ni among na.

Pukul 7 nunga sae be film i, dungi diorahon si Tumpak ma nasida mangan mie tu restoran China. Sungkun sungkun ma roha ni si Longga dohot si Jojor dibagasan, ma marhepeng si Tumpak nuaeng, nang pe ndang adong dope motor na. Diida si Longga do muse lapo, kios bensin, miak, boras na dijolo ni jabu ni si Tumpak tingki i.

Borngin i ndang mulak anggo si Jojor, di jabu namboru nai do modom songon nasomal, sipata las rampak marminggu do dohot namboruna marsogot na i dohot si Leonard nang ibotona. Disungkun si Tumpak ma si Jojor :"Naung mar hamlet do hamu ?', ninna mandok.