NOVEL PHP : 4. MOLO MANDULO BINTANG HASIAN

Mulak ma tu Yogjakarta, dipataru ma au tu bandara FL.Tobing di Pinangsori dohot do paribanku naduai pataruhon. Amang, Inang, Ibotongku sude mangumma, songoni si Jojor. Parpudi ma hujalang si Longga, alai maila ila imana naeng mangumma, dang huboto alana. Ba huummahon hatop, tarsonggot imana,  jala huhusippon : “Pasahat tabe tu si Poltak da”, ningku. Marrara bohina.

Bandara Pinangsori jonok do, holan 34 kilometer do sian Sibolga. Jala gelleng do, alai habang do Garuda tiap ari sian Soekarno Hatta dohot Kuala Namu. Jadi molo ro sian Jakarta dang pola be ingkon tu Medan, manang tu Silangit, baru pe mar bus 7 – 8 jam lelengna tu Sibolga.
Goar ni bandara on, Dr. Ferdinand Lumban tobing, goar ni pahlawan sian huta on, lulusan sian Kedokteran Universitas Indonesia, hea gabe Komandan tentara pejuang  Tapanuli mangalo Bolanda dohot Japang, hea gabe Gubernur Sumut paduahon, jala hea gabe Residen Tapanuli di Sibolga

Mulak tu Yogjakarta, sibuk ma kuliah, marsaor dohot dongan sa indekos, dongan mahasiswa. Ala sibuk, ba lupa ma nasundat tukar cincin i. Alai molo dung ma malam Minggu, mulai ma tarhilala, olo ma ro haliluni paribanki, dongan saparmeaman i. Maruntung adong dongan sa indekos mardalani, manang manonton, dua ma putri Solo dohot sada boru Yogjakarta, donganna sakuliah. Molo malam Minggu rodo 2 kadet AAU, Akademi Angkatan Udara hallet ni nadua putri Solo i. Gabe au ma dongan ni borua, Sri Setianingsih, na tinggal di Jalan Kauman, jonok tu alun alun Utara, Istana ni Sultan. Jalan Kauman on, dipudi ni Mesjid Agung, inganan ni silom nautusan, angka na marhatohonan.

Pendek ni torsa, nunga 2 taon hami namasitandaan. Molo lao kuliah dua motor do hami. Sada dipakke Sumiyati diboncegma si Endang. Sada nai, au mambonceng si Sri. Ala dang pola dao kampus nami. Jolo hutaruhon do si Sri tu kampusna, Universitas Islam Indonesia (UII), manang na si Sri mamboan motor, au ditinggalhon di kampushu di Gajah Mada di Bulaksumur.

Disada tingki, tingki mangan hami di lapo gudeq, didok si Endang :”Tar marniang bang Leo on”, ninna. “Ah daong ba”, ningku mangalusi. Dang huboto antong manang na moru do timbangangku. Hucaritohon ma na sundat au tukar cincin, huhut huserbeng si Sri. Didok si Sri ma hatana :”Bah bah na gabe ban serap do au hape", ninna, jonjong imana, laos ditogihon si Endang dohot si Sumiyati mulak, ditinggalhon sahalakku. Tung murhing bohina, ala ni murukna. Malam Minggu nai ndang olo be si Sri ro tu indekos nami.

Ari Senen nai pukul 10 ditelpon si Sri ma au ninna :”Bang nga habis kuliahhu, Abang boa ?”, ninna. "Dang muruk be ho huraha tu au ?", ningku. Dang dialusi sungkun sungkun hi, alai didok ma : “He he he, molo sanga laho ma hita tu Kaliurang, adong na porlu dohonon ku”, ninna muse. Ba aha ulaning naporlu narohangku, las hutinggalhon ma kuliah, lao ma hami tusi.
Kaliurang on inganan wisata jala ngali, tabo hilalaon, ribur do molo ari Sabtu, ari Minggu manang ari libur. Dang pola dao sian kampus UII manang kampus Gajah Mada, Bulaksumur.

Sri pajolohon mangkatai :’Sai songon na sip do Abang dung mulak sian kampung”, ninna. “Somalna bahat hian do caritamu na geok, ido baen na lomo rohangku tuho, obuk ni Abang nuaeng gabe gondrong dang tarurus”, ninna muse.
Hucaritahon ma sude sangkap nami nasosaut tukar tintin. “Na borat dang naso saut tukar tintin, alai ila ni natua tuai do”, ningku.  "Ima da songoni do hasomalan di huta nami, molo boi marpariban", ningku.
“Adong dope hape adat ingkon kawin dohot pariban, songon Siti Nurbaya”, ninna imana heran.

Hualusi ma songonon :  “Imana nunga adong halletna, tentara, dang olo au dibaen ban serap”, ningku. Torus husambung : “Au pe nga adong hallethu”, ningku mengkel huhut hugait huruma na marlubang i.
“Ido Abang nanaeng dohonongku”, ninna huhut dihaol gontinghu gomos. Dang bahat jolma ala ari Senen do antong. “Unang jolo muruk ho da hasian, ai olo do Abang masuk tu silom ?”, ninna huhut dibereng matakku.
Dang hutatap simalolongna, alai sai hupanotnoti angka bunga bunga di taman i. Leleng au sip, dang hualusi. Dang mungkin tinggalhonongku Tuhan i, ai gelleng dope au nunga mangkatindangkon haporseaon. Nangpe natua tuai ndang pangula ni huria, alai dang natinggalhonongku Tuhanki, ningku dibagaan rohangku.
Dung leleng sai sip hami nadua ala borat ni sipingkiron, hudokma :“Ho ma antong masuk Kristen, mangalua hita”, ningku mangalusi. Tangis ma imana martutuk hian, mancai gogo. “Seatonna ma au molo ihutononku Abang”, ninna, sai maraburan iluna. Hulap ma hurum dohot simalolongnai. Ala ni ngalina, naeng udan muse, hupangkehon ma jekethu dipakke.

Hami do na oto saleleng naon. Ma binoto ndang mungkin hami gabe sada, alai sai huulahon hami. Ai na lomo do rohana tu au ala malo au marende, margitar, mambaen angka engkel. Dungi tangkas diboto imana halak Batak setia, ndang olo kawin padua hali hon.
Aupe lomo do  rohangku, pangkataionna mansai lambok, pangoloi, uli rupana jala bagak imana pake jilbab, bajuna pe pas dibadan, denggan berengon. Jala adong dongan marnonang.

Molo si Longga nunga solot rohana tu si Poltak. Aupe suang songoni do, naung adong do dongan donganhu di Yogjakarta. Alai ala sai ingkon marpariban do inna inang, ba songoni ma ujungna.

Dungi didok si Sri ma:”Natua natuangku nga muruk, mangorai hita sai pajumpang songon nasailaon on”, ninna.
“Mardongan biasa ma hita”, nina inongku huhut ditiop jari jaringku jala dipeakkon uluna diabaranku asa unang marsak au. Matana pe manetek tu hurumna huhut hulap dongon tanganku, huhusippon ma :”Naung adong do halletmu pinillit ni natorasmu ?”, ningku mansai langet. “Daong Abang, dang adong, ai aupe torus do naeng kuliah”, ninna huhut lam doras iluna madekdek.

“Molo i na dumenggan, ba bea bahenon”, ningku huhut hutiop ulungku, hubereng dao tu kapal habang nanaeng landing di bandara Adisucipto. Hami nadua pe ma sahata, naeng mulai mandao, ala dang mungkin holong nami marputik ala ni agama.

Ma naeng potang ari, nga ro rimbus, ngali muse, huhojot hami ma mulak. Ala licin ni dalan, dihaol ma au gomos sian pudi, adongma pasir di dalan nanaeng tu toruan, tarsulandit ma motor nami, danggur ma hami tu toru ni dalan. Marmudar uluna, hona mudar ma jilbab dohot bajuna, patna pe hansit, tengkat ma mardalan. Anggo au holan tangan dohot pat hu do na leccet, maribak saloarhu.
Diangkat jolma nadi hutai, jala diboan ma hami tu Rumah Sakit Sarjito di Bulaksumur.

Dung sai diubati, dipataru ma hami tu jabu ni si Sri di Jalan Kauman pake ambulan. Sian mobil tarpaksa ditiop imana abarangku. Inongna mambuka pintu :”Mahua on Leo”, ninna mansai gogo, huhut dihaishon tanganku sian si Sri. “Maaf bu, madabu hami sian motor”, ningku mangalusi.
“Lao ho, lao saonnari hatop”, ninna Amongna muruk hian. “Lao ho”, ninna huhut ditudu tu pintu haluar.
Saleleng mardongan dongan hami dang hea dope au masuk tu jabu. Sai dijolo ni Mesjid Agung i do au pataruhon. Ai sai diorai si Sri, dang hea dope halak Kristen ro tu jabu nasida, parhutaan ni pimpinan ni silom nautusan di Yogjakarta.

Dua minggu pe hami boi pajumpang muse dung malum dihilala, mangan gudeg marlage di Malioboro. Ditingk i ma au mangido maaf tu si Sri.
“Maaf ya Sri, tingki i, tung marsak rohangku ala ndang mardongan be hita, gabe tarsulandit motor i”, ningku huhut hutiop tanganna.
Hucaritohon muse taringot tu si Longga naung kuliah di Medan jala disido halletna, si Poltak mangihuti Secapa, sikola tentara, calon perwira. Matung putus sude barita sian imana.
“Maruntung hita mardongan, boi ho dongan mangkata hatai angka di parungkilon”, ningku huhut  hubereng matana na lamboki. Imana pe tong dibereng mataku tombus tu ate ate. Hansit pangkilalaan na ingkon marujung ma hape pardonganan nami.

Borngin i inongni si Sri menelpon tu Sumiyati di jabu indekos nami.
“Sum, HP ni si Sri ndang mangolu, boi do mangkatai satongkin ?”, ninna.
Sian burju ni rohana si Sumiyati mandok :”Lao mangan gudeq nasida tu Malioboro bu”, ninna.
“Dohot si Leo do ?”, ninna muse.
“Olo bu”, ninna mangalusi.

Dang sadia leleng roma Abang ni si Sri mandiori tu Malioboro. Ai dang pola dao jabuna tu Malioboro. Tingki mangan, hupangido tu pelukis disi manggambar bohi ni si Sri.
“Mbak Sri disuru mulak”, ninna Abangna.
Dang boi be si Sri mandok agia aha, lao ma imana mulak dohot Abangna.
Tinggal ma au huhut paimahon gombar ni Sri mar jilbab na balau, on ma gombar parpisahan nami. Hutempel ma gambari dikamar hu.
Parmangan gudeq namarlagei, inganan na so boi lupahononton, tuson do au ro molo masihol tu imana, jala sai tuson do au ro molo ro tu Yogjakarta.

Mulai sian borngini si Sri dang diloas be haluar borngin, dang boi be marsiajar borngin. Lao kuliah pe dang hea be rampak dohot hami. Nomor HP na pe nunga diganti naimbaru, dang binoto nomorna.
Molo hulului di kampus nasida di UII, ma mandao imana, martabuni, dang olo be imana pajumpang. Sahat tu semester opat dang ro be ibana kuliah.
Tompu ma di ari Senin potang, roma udan, ronggur,  roma pak pos mamboan "Surat undangan pernikahan" tu hami di jabu indekos, goar ni Sri Setianingsih, tangkas tarsurat di harotas na balau. Untung ma au jonjong maniop tiang, dang madabu. Dang adong dongan nabarani mandok hata tu au, da holan manerbeng, asi roha nasida.

Dapot ma tingki na, lao ma hami dohot sude dongan indekos dohot kadet Angkatan udara lao tu pesta perkawinan. Sri tambah ulina mamakke baju Jawa. Si baoadi pe timbo, mamakke piso di gontingna di pudi ni bajuna. Tabo begeon suara ni musik karawitan manggohi pestai.
“Beta tajalang”, ninna mbak Endang. Tarsonggot au namarangan angan, mardalan ma hami manjalang tu jolo. Auma parpudi masijalangan. Tingki hutiop tanganna leleng, maraek simalolongna, naeng huapus dohot saputangan, alai diserbeng amongna au. Hupaulak ma sapu tanganhu. Tarbege ma lagu ni sinden mangendehon “Yen ing tawang ono lintang cah ayu”. Artina, MOLO MANDULO BINTANG HASIAN.

Dung diboan tunggane dolina si Sri tu Semarang, gabe songon na lungun hian huhilala nangpe ribur dongan. Molo borngin olo do au lau tu lapangan Alun alun mamereng bintang, songon hasomalanhu dohot si Sri. Mar tebak tebakan do hami goar ni bintang, alai au do na jot jot sala.

Asa unang sai pinikkiran borua na lambok marroha i, muncat ma au tu jabu kos ni dongan, si Bonar, par Balige di Lempuyangan, dang sadia dao sian stasiun Kereta Api.

Di Yogjakarta adong ibotona, anak ni amang udana sian Semarang. Timbo bandanna alai antar birong uli, songon uli ni si model Naomi Campbel, goarna si Lasma, kuliah di fakultas Farmasi. Molo ari Sabtu dohot ari Minggu jot jot ro tu jabu kos ni ibotona i. Aupe gabe jot jot dohot nasida nadua mardalan dalan, manonton manang na mangan. Sipata si Lasma do manggarar, ai amongna namora, adong toko buku nasida di Semarang, di Jalan Pandaran. Di ari Minggu pe rap do hami marminggu tu gareja HKBP na di Kotabaru.

Boi dijaha di www.see-soul.blogspot.com