TOKKE NAPOSO (10)

Nunga lulus test SNMPTN si Longga di USU jala martahi borhat tu Medan dohot Amangna pataru tu jabu ni udana. Si Jojor singkola dope huhut manjaga jabu mandongani Inang natumubuhon.
Maradian ma bis sogot manogot i dijolo ni jabu, dihaol si Jojor ma kakak nai mancai gomos, diummai huhut manetek iluna."Denggan denggan ho marsiajar da boru", ninna inangna huhut diapus siubeonna. Mardalan bus i huhut didada nasida sahat tu ndang tarida dipengkolan. Dihaol inang na ma si Jojor masuk tu jabu.

Potang ari ro ma si Tumpak tu jabu ni si Jojor. Dibereng lungun do pardompahan ni si Jojor. "Beha lao ma hita manonton pilem parjolo, pukul lima, asa hatop hita mulak", ninna si Tumpak asa lupa arsak ni rohana. "Hupaboa majo tu Inang da". "Ma, lao jo hami manonton pkl 5",ninna. "Olo, alai hatop hamu mulak da ?". "Olo mak".

Hape sahat tu Sibolga ndang saut nasida manonton, mangan sate Padang do di restoran, dung sian i lao ma nasida tu sabola ni pelabuhan, hundul mamereng laut potang paima mataniari manjonoki topi laut, marrara, mansai uli idaon tarida halilu ni mata niari i sahat tu topi laut.
Ndang sadia leleng manghuling ma hand phone :"Hallo, khabar baik Lian, saya lagi dirumahnya Jojor", huhut diserbeng si Jojor. "Ari Sinen pe hita maretong, ndang boi marsogot, kan marminggu hami, sudah ya, daa", huhut disakkui handphonenna.

Disi ma disungkun si Jojor :"Bang husungkun majo ho, boado pardonganonnmu tu si Su Lian, asa huboto tangkas unang margabus Abang ?". "Ah ho nean sai asing do hatam ba, kan ma hea hudok hatangku", ninna huhut ditiop tanganna. "Aha didok Abang, dok ma tangkas", ninna si Jojor. "Ma diboto ho nadirohangkon, masibotoan do hita", ninna si Tumpak. Ditarik si Tumpak ma ulu ni si Jojor tu andora na, ala ma bonom mata niari, ma mulai golap, ndang diida halak na adong rap hundul disi.

Lao mulak dipangido si Jojor asa maradian di jabu ni namboruna di jalan Sikkola tukkang. Langsung ma si Jojor tu bilut ni namboru nai, huhut diumma."Horas namboru, ma borhat si Longga nasogot tu Medan dohot Amang, gabe lungun lungunan hami dohot mama". "Leo, dongani jo pariban mon mulak tu Simaninggir ma borngin on", ninna mamakna. "Marsogot ma hita tusan mardalani mak, ai si Tumpak do donganna ro tuson", ninna mangalusi. "Ai ise do hamu nadua na gabe parumaenhu ?", ninna namboru nai huhut disiuk hurum i maen nai.

Marsogotnai, dung sae marminggu roma tutu pariban ni si Jojor, si Leonard dohot inangna tu dolok, Simaninggir. Huhut masirarian huhut minum tes dohot goreng pisang na las, disungkun nai Leonerd ma edana i :"Ai ise do maen hon nasaut gabe parumaaenhu ?". "Ba nasida mai eda, angka naposo i, ai sae naing singkola do nasida eda", ninna nai Longga mangalusi. "Ima ni Leo ma dibege ho, hope toruson ma kuliah mi unang talu tu pariban mi", ninna inang na.

"Ta pasombu majo nasida singkola eda, unang sai dihuta, asa lambas fikiran nasida. Ba haduan boi angka sarjana manodo nasida, molo di huta, ba mulak mangguris gota ma", ninna nai Longga. "Ima eda loja nami marsuru asa ringgas ringgas si Leonard on marsiajar asa boi kuliah tu Medan muse".
Anggo si Jojor dohot si Leonard holan na mambege bege do sian nadao, sian bilut tamu, ndang dohot nasida manghatai di bilut tonga tonga. "Moloso kuliah si Tumpak, bahat hepeng na, boi do ulaning ?", songoni ma dipahusor husor si Jojor dibagasan rohana.
Songgot do roha ni si Jojor tingki disungkun si Leonard :" Beha do hubunganmu tu si Tumpak, huida hallet mu doi", ninna si Leonard. "Ah bang, namardongan dongan dope hami, au kan singkola dope", ninna mangalusi. "Jadi kuliah doho dung tammat ?". "Olo, ido pangidoan ni inang, ala boi dope nasida pasingkolahon hami", ninna si Jojor mangalusi.